Tababarka Djibouti uga furmay macaliminta K/Gacanta Soomaaliya.

Djibouti: Magaalada Djibouti waxaa si rasmi ah uga furmay tababarka Tababarayaasha Kubadda Gacanta heerka 1-aad [IHF/OS-Coaching Course Level : Beginners-Advanced ]oo ay soo qabaqanqabiyeen IHF iyadoo ay maalgelinayso Olympic Solidarity, wuxuuna soconaya 12-19-0/02/2010.
Xaflad si heer sare loo soo agaasimay  kuna saabsan Furitaanka  tababarkan ayaa  waxaa ka soo qeybgalay mas`uuliyiinta ugu sareysa Olambikada labada  dal iyo mas`uuliyiin ka tirsan Xiriirada  Kubadda Gacanta  iyo Kubadda Koleyga Somalia .

Ugu horeyn  waxaa  halkaasi ka hadlay Guddoomiyaha XSK/Gacanta Maxamed Xuurshe Xasan (Eenoow) oo ka warbixiyay  agaasinka Tababarkan Kubadda Gacanta  wuxuu tibaaxay in XSKG inuu dadaal u galay hirgelinta Tababarka una soo xushay Tababarayaal  ku haboon .wuxuu u mahadceliyay Wasaaradda Isboortiga Jabuuti XKKJ,XKCJ iyo saraakiisha xerada Ilaalada jamhuuriga iyo Khabiirka Hans Peter Thuum   wuxuuna kula dardaarmay  tababarayaasha  in ay ka faa`ideystaan Course-kan.

Hans  Peter  Thumm  Khabiir ka socda IHF  una dhashay dalka Germany ahna Tababaraha tababarayaasha Kubadda Gacanta  Soomaaliyeed  ayaa wuxuu  sheegay inuu ku faraxsan yahay  tababarkan   wuxuuna sheegay in uu wax badan ka caawini doono Tababarayaasha isla markaasna  uu ku rajo weyn yahay in si wanaagsan uu ku dhamaado Tababarkan .

Kusimaha Safiirka Soomaaliya u fadhiya  Jabuuti C/raxmaan Maxamed Hiraabe ayaa  tibaaxay in ay farxad u tahay inuu arko  sida weyn ee isboortiga Soomaaliyeed kor loogu qaadayo  wuxuu GOS ku amaanay dadaalka badan ee ay u galeen horumarinta tayeynta  Tababarayaasha Soomaaliyeed  wuxuuna kula dardaarmay  in ay si weyn uga faa`ideystaan tababarkan.

Guddoomiyaha Guddiga Olambikada Somaaliyeed Aadan Xaaji Yabaroow [Wiish]  ayaa ka dhawaajiyay in muddada uu xilka hayo ay kooban tahay isla markaasna uu dadaal u galay sidii loo heli lahaa horumarin taasoo ah wixii uu balan qaaday intii aan la dooran .

"Taarikhda Isboortiga Soomaaliya ma dhicin Tababaro sidan u weyn oo isku mar dhacaaya ,Mudada aan xilka hayo iyadoo ay kooban tahay haddana GOS dadaal ayay u gashay hirgelinta Tababaradani" sidaas waxaa ka dhawaajiyay Guddoomiyaha GOS Aadan Xaaji Yabaroow (Wiish) oo intaasi ku daray in GOS ay xagga maalgelinta ka kaashatay  Olympic Solidarity  wuxuuna u mahadceliyay mas`uuliyiinta isboortiga jabuuti iyo IHF iyo khabiirka Hans Peter  iyo shirkadaha Jubba Airways iyo Qaran Express oo gacan muhiim ah ka qaatay  dhiirigelinta isboortiga Soomaaliyeed .wuxuuna ugu danbayn xarigga ka jaray furitaanka tababarka Tababarayaasha Kubadda Gacanta.

Waa  markii labaad tababar  Caalami ah  oo ay ka qeybqaadanayaan tababarayaasha K/Gacanta   oo heerka 1-aad waxaana kani uu uga duwan yahay iyadoo lagu qabanayo meel ka baxsan dalka.

Said Ibrahim Hussein [BUUNA]